18, నవంబర్ 2010, గురువారం

మా ఇంటి తంటా!!!

"నందికొండా వాగుల్లోనా నల్లాతుమ్మా నీడల్లో", అంటూ భయంకరమైన పాటతో చీకటిపడుతున్నవేళ షర్టుజేబులోవున్న సెల్ ఫోన్ రింగ్ అవటంతో..., కుకట్ పల్లి విలేజ్ దగ్గర ట్రాఫిక్లో ఇరుక్కున్న శంకర్రావు వాళ్ళావిడకోసం అని కష్టపడిసంపాదించి మరీ పెట్టుకున్న ఆ రింగ్ టోన్ వినగానే చిరాగ్గా సిక్స్ ప్యాక్ మొహంలో తెప్పించుకుని.. "మా రాక్షసిదే ఫోను.. మళ్ళీ దీనికేం గుర్తొచ్చిందో....", అనుకుంటూ సెల్ ఫోన్ బటన్ నొక్కి.. హెల్మెట్ కవర్ కాస్త పైకి జరిపి చెవికీ హెల్మెట్క్ కి వున్న ఇరుకులో ఫోన్ ని ఎడ్జస్ట్ చేసేసి హీరోహోండా స్ల్పెండర్ బండిని రెండోగేర్ లోవేసి లాగిస్తూ.. "హా.. ఏంటో త్వరగా చెప్పు.. నేను ట్రాఫిక్లోవున్నాను" అన్నాడు తన భార్య పార్వతితో.

"ఏవండీ.. వారం క్రితం.. గృహిణి టీవివాళ్ళకు.. నేను రాసిపంపించిన వంటకం లక్కీడ్రాలో సెలక్టయ్యిందంటండీ.. ఈ ఆదివారం ఆ వంటకం షూటింగ్ కు వస్తున్నాము.. అన్నీ రడీచేసుకోండని.. ఇప్పుడే ఫోనుచేసి చెప్పారు.. ఈ విషయం మన కాలనీ వారందరికీ చెప్పాలి వస్తూ వస్తూ నాలుగు కిలోల స్వీట్స్ పట్టుకురండి.. హౌసింగ్ బోర్డులోవున్న మీ ఫ్రెండ్ షాపులోమాత్రంతేవొద్దే.. ఆ ముతకకంపు స్వీట్స్ ఇస్తే మనపరువుపోతుంది.. కాస్త  ఖర్చయినా పుల్లారెడ్డి స్వీట్స్ పట్టుకురండి..", అని సంబరపడిపోతూ చెప్పింది పార్వతి.

ఆనందంలోవున్న శ్రీమతికి ఎదురుచెబితేఏమవుతుందో ఒక్కసారి వూహించుకున్న శంకర్రావు వులిక్కిపడి మన లోకానికొచ్చి.., ఇప్పుడు కుళాయి విప్పిందంటే.. హౌసింగ్ బోర్ట్ కాలనీ మొత్తం వరదలే వరదలు..  పుట్టింటికని సూట్ కేస్ సర్దిందంటే?,  దారి చార్జీలూ వదులుతాయి.. వీధినపెట్టి పరువూతీస్తుంది  ఎందుకొచ్చిన గొడవ.. ఆ డబ్బులేదో స్వీట్స్ కొనేస్తేపోలా.. అనుకుని.. లెక్కలేసుకుని.. "సరేలే తెస్తాను.. పుల్లారెడ్డి స్వీట్స్ అంటే నేను కుకట్ పల్లివరకూ వచ్చేసా మరి.. ఇప్పుడు ఈ ట్రాఫిక్లో వెనక్కువెళితే ఇక రేపొద్దున్నే ఇవ్వాలి స్వీట్లు... చూస్తాలే వేరేచోట", అని కాస్త స్వీట్ల ఖర్చులోనైనా కటింగ్ వేద్దామని మాటతిరగేసాడు శంకర్రావు.

"మెయిన్ రోడ్డు దగ్గరకూడా ఒక బ్రాంచీ వుంది కదా!!, మొన్ననేనూ.. మా ఫ్రెండ్ చిట్టీ.. వివేకానందానగర్లో వున్న వాళ్ళ అక్కగారింటికి వెళ్ళినప్పుడు - అక్కడే కొనుక్కుని తీసుకెళ్ళాం... మీకు ఎడ్రస్ తెలియకపోతే ఎవరినన్నా అడగండి.. అక్కడేకొనండి.., నేతితోచేసినవి చాలా బాగుంటాయి.." అని సలహా ఇచ్చింది పార్వతి.

"ఓహో నీకు అదీ తెలిసిపోయిందా.. ఆ చిట్టీ.. పొట్టీకి పనేముంది.., వాళ్ళాయనకే సాఫ్ట్వేర్ ఉద్యోగం నేతితో ఏంటి బంగారంతో చేసినవైనాకొంటుంది..", అని మనసులో తిట్టుకుంటూ, "సరేలే.. పెట్టెయ్ తెస్తాను..", అని కంగారులో ఒక గేరు ముందుకేసేసి బండిని గర్ ర్ మనిపించి.. మళ్ళా తడబడి.. నెమ్మదిగా క్లచ్ పట్టుకుని.. ముందుకు నడిపించాడు. శంకర్రావు.

ఇంటికొచ్చి తలుపు తట్టగానే సెకన్లలో తెరుచుకున్న తలుపు వెనుకే ముక్కుతగిలేంత దూరంలో, త్రీడీ సినిమాలో దేవతసినిమా చూసినట్టుగా పైనుండి కిందకు దిగపోసుకున్న బంగారునగలతో.. మొహంమీదకొచ్చి ఎదురుగా నిలబడుంది పార్వతి.. "ఈ నగల దుకాణం ఒంటిమీదేసుకు తిరుగుతున్నావ్ దేనికే?, ఎవరింట్లోనన్నా పేరంటం కబురొచ్చిందా", అని అడిగాడు.. స్వీట్లకయ్యిన వెయ్యిరూపాయల బిల్లును నాలుగుసార్లు పరికించి చూసుకుని, మరీ మరీ తెచ్చుకున్న శంకతో ఊగిపోతున్న శంకర్రావు.

"పేరంటమా పాడా.., ఈ స్వీట్లు పంచడానికెళదాం పదండి మీరు త్వరగా ఫ్రెస్ అయ్యి రండి", అని స్వీట్లప్యాకెట్టు చేతిలోంచి లాక్కుని.. పైనుండే కుక్కలావాసన చూస్తూ.. "అబ్బా అదే.. పుల్లారెడ్డి నెయ్యివాసన.." అంది పార్వతి.

"పొద్దున్నుండి ఆఫీసులో పనితోకొట్టుకుచచ్చి కాళ్ళీడ్చుకుంటూ ఇంటికొచ్చాకా, వేడివేడిగా కాఫీనో టీనో తీసుకొచ్చి ఇవ్వకపోగా.. నాకిదో గొడవేంటే.. నేను రాను.. తలనొప్పిగావుంది.. అమృతాంజనం రాసుకుని పడుకంటా.. నువ్వెళ్ళి ఆ ఏడుపేదో ఏడు..", అని కాలిబొటనవేళ్ళమీదలేచి నిలబడి కస్సుమన్నాడు శంకర్రావు.. భర్త పరిస్థితి చూసిన పార్వతి మారుమాట్లాడకుండా నగలదుకాణం తో పాటుగా స్వీట్లప్యాకెట్టు మోసుకుంటూ బయటకు బయలుదేరింది.

శంకర్రావు అమీర్ పేటలోవున్న ఓ కంపెనీలో ఎకౌంటెంట్ గా పనిచేస్తుంటాడు... నెలకు పదిహేనువేలు జీతం.. రోజుకు పదిహేనుగంటలు పని.., సాధాసీధా బతుకుతో బండినలా నెట్టుకొస్తున్నతనికి, ఇంట్లోవాళ్ళు వయసయిపోతుందిరా బాబూ అని బ్రతిమలాడి.. వద్దువద్దన్నా.. బలవంతంగా పెళ్ళిచేసేసారు.., పెళ్ళయిన మొదటిరోజునుండీ కష్టాలు మొదలయ్యాయి శంకర్రావుకి... తను ఇదంటే.. ఆమె అదంటుంది..,మిద్దెంటే మేడంటుంది..,వద్దన్నదే ముద్దంటుంది.. , అలా ప్రతీదానికీ తనకు వెతిరేకదిశలోనే వెళ్ళే పెళ్ళాంమాట కాదనలేక.. నాకిలాగే రాసిపెట్టుంది.. నా ఖర్మింతే..అనుకుంటూ.., తనే కాస్తోకూస్తో కాంప్రమైజ్ అయిపోతూ... కష్టాలను దిగమింగుతుంటాడు శంకర్రావు.

అసలు ఈ గృహిణి టీవీవాళ్ళను... ఏంచేసినా పాపంలేదు.., ఆడదంటే అబలకాదు.., ఆడది ఆట వస్తువుకాదు.. అని ఆడాళ్ళలో లేని నెగిటివ్ థింకింగ్ ని నూరిపోసి.. పెద్దపెద్ద లెక్చర్లివ్వటం.. పిచ్చిపిచ్చి ఆటలకాంపిటీషన్లు పెట్టి.. పదిరూపాయల గిఫ్ట్లిస్తూ.. ఏదోపెద్ద దేశసేవచేస్తున్నట్టు.. బిల్డప్లు ఇవ్వటం, మళ్లీ ఈ వంటలప్రోగ్రాములొకటి.. మా ప్రాణాలు తియ్యటానికి.. అని రిమోట్ కంట్రోల్ పై ప్రతాపమంతా ప్రదర్శిస్తూ.. టీవీ చూస్తూ మనసులో తిట్టుకుంటున్నాడు శంకర్రావు. ఆ తిట్లు పవరు తట్టుకోలేనట్టుగా.. మంచిటైమింగ్లో కరెంటు కట్ అయ్యింది.. హమ్మయ్యా పీఢా విరగడయ్యింది.. అనుకుని కళ్ళుమూసుకున్నాడోలేదో.. ఎవరో గులకరాళ్ళు రేకుడబ్బాలో వేసి వాయించుకుంటూ వస్తున్నట్టుగా.. శభ్దం వినపడేసరికి.. మా రాక్షసి వచ్చేస్తున్నట్టుంది.. అనుకుంటూ మొహం చేతితో కప్పేసుకుని నిద్రనటించేసాడు శంకర్రావు.

"ఏవండీ సురేఖలేదూ.. ఎంతమాటందో తెలుసా.. మీ కిచెన్ మొత్తం టీవీలో చూపిస్తారు తెలుసా.., ఆ కెమేరాముందు అన్నీ రిచ్ గా కనిపించాలి.., మీ ఇంట్లోచూస్తేనా.. అన్నీ మాడిపోయిన స్టీలుగిన్నెలే.. కనీసం షూటింగ్ రోజైనా తళతళమెరిసేలా కడగండమ్మా అని అందరిముందూ వెటకారంచేసి.. వెకిలి నవ్వునవ్విందండీ.., దానికెంత పొగరో చూడండి.., నాతోపాటుగా అదీ.. పోటీలకు ఎంట్రీ పంపించింది,అది సెలెక్ట్ అవలేదని.. నాకు ఛాన్స్ వచ్చిందనీ కుళ్ళుదానికి.. ఎలాగైనా దానిపొగరనుస్తాను.. , బిగ్ బజార్లో  ఎక్చేంజీ ఆఫరంటా!!, ఏదైనా పాతవస్తువు తీసుకెళ్ళి కొత్తదాంతో మార్చేయ్యచ్చంటా..!,  మొన్న టీవీలో చూపించాడు.. మన పాతసామనంతా మార్చేసి.. కొత్తసామానుకొనేద్దాం.. అప్పడుగానీ దానికి బుద్ధిరాదు.."  అని నిద్రనటిస్తున్న శంకర్రావు నెత్తిమీద కొత్తగా స్టీలుగిన్నెల భారం తెచ్చిపెట్టింది.

"అయ్యబాబోయ్.. మళ్ళా ఈ కొత్తసామాను కొనే టెన్సనొకటిపెట్టిందా", అని తలచుకునేసరికి నటిస్తున్న నిద్ర ఎగిరిపోయింది.., అప్పుడే కరెంటురావటంతో ట్యూబులైటు మినుకుమినుకుమని నాలుగుసార్లు కొట్టుకుని వెలిగింది. కంగారుగా లేచి బాత్రూమ్లోకెళ్ళి పైకిసౌండురాకుండా కన్నీళ్ళు కార్చి ఆ కన్నీళ్ళతోనే స్నానం చేసాడు శంకర్రావు.

స్నానం చేసొచ్చి.. డైనింగ్ టేబుల్ పై రడీగా వడ్డించి పెట్టిన భోజనం దగ్గర కూర్చున్నాడు. మాడిపోయిన ముదురు బెండకాయ వేపుడుని అన్నంలో కలుపుకుని.. బలవంతంగా తింటూ.. "ఒక్కసారి ఆలోచించే..!, వాళ్ళెవరోకోసం సామానంతా మార్చేస్తే ఎలాగే.. ఈ నెల అసలే చాలా ఖర్చులున్నాయి.., అవన్నీ పోగా.. ఒక్క వెయ్యిరూపాయలు కూడా మిగలవు..., ఇప్పుడు డబ్బులెక్కడతెస్తామే..", అని కళ్ళళ్ళో కళ్ళుపెట్టి చూసే ధైర్యంలేక.. ట్యూబులైట కాంతిలో... పక్కనేవున్న సాంబారు గిన్నెలో పడ్డనీడలో పార్వతొంక చూస్తూ చెప్పాడు శంకర్రావు.

"మిమ్మల్నెమన్నా నేనిప్పుడు డబ్బులడిగానా?, అప్పుడే ఎందుకంత కంగారుపడిపోతున్నారు..., రాకరాక వచ్చిందండీ అవకాశం.. ప్రపంచం మొత్తం మనల్ని టీవీలో చూస్తారు.. అలాంటిది ఆనందించడం పోయి.. ఇలా.. మాట్లాడితే తలపట్టుకంటారెందుకు?" అని కసురుకుంది పార్వతి..

"హమ్మయ్యా.. ఇప్పుడు డబ్బులక్కర్లేదన్న మాట..", అని మనసులో అనుకుని.., మరి కొత్తసామానంటున్నావు..ఎలా.. అని ఆశ్చర్యంతోకూడిన  ప్రశ్నొక్కటేసాడు శంకర్రావు. ఈ నెలనాకు డబ్బులక్కర్లేదు.. మీ క్రెడిట్ కార్డుందిగా అదివ్వండి చాలు... ఇస్స్టాల్మెంటులో కట్టుకందాం అని అసలు బాంబు సాంబారువడ్డించినట్టు ప్లేటులో వడ్డించింది పార్వతి.

శ్రీమతి తెలివితేటలకు నవ్వాలో లేక.. క్రెడిట్ కార్డు రూపంలో జేబుకు పడబోతున్న చిల్లుకు ఏడ్వాలో తెలియక.. విన్న షాకింగ్ న్యూస్ కి మొదలయిన టెన్సన్ వల్ల.. నోట్లో పెట్టుకున్న సాంబారు ముద్ద ముందుకు వెనక్కు కదలకండా గొంతుకడ్డం పడిపోయింది శంకర్రావుకి. గ్లాసుడి మంచినీళ్ళు గటగటా తాగి.. సాంబారుముద్దని లోపలికి గెంటేసాడు.

భార్యమాటకు తిరుగులేదని తెలిసినా.. కాసేపు ఆలోచించి చించి ఒక నిర్ణయానికొచ్చినట్టుగా నటించి.. "సరేలే క్రెడిట్ కార్డిస్తా.. కాస్త చూసి జాగ్రత్తగా ఖర్చుచెయ్యి... లేకపోతే క్రెడిట్ కార్టు బిల్లు కట్టలేక పరారయిన దంపతులు అని ఆ వంటలప్రోగ్రాము తరువాత మరళా టీవీలో కనిపించే అవకాశం వస్తుంది..", అని చమత్కరించాడు శంకర్రావు.

తరువాతరోజు ఆఫీసుకు వెళుతున్న భర్తతో పాటే షాపింగ్ కి బయలుదేరింది పార్వతి. అమీర్ పేట బస్టాపులో దించేసి.. జాగ్రత్త అని చెప్పి ఆఫీసుకెళ్ళిపోయాడు శంకర్రావు.

తెల్లవారింది.. బలవంతంగా నిద్రలోంచిలేపేయటంతో ఇంకా నిద్రమత్తు వదలలేదు శంకర్రావుకి, నిద్రలోనే నడుస్తూ టూత్ బ్రష్ కి పేస్టు పెట్టుకుని నోట్లోపెట్టుకున్నాడు.. అలా బయటకొచ్చి చూసే సరికి పెద్దగార్డెన్ కనిపించి ఆశ్చర్యంకలిగించింది. "వున్న నాలుగు మొక్కలకూ నీళ్ళైనా పోసే టైముండని మా దెయ్యం.. ఒక్క రాత్రిలో ఇంటిముందు ఇన్నిమొక్కలెలా పెంచిందబ్బా..", అని ఆలోచనలో పడ్డాడు శంకర్రావు. "ఈమొక్కలెలా వచ్చాయే.. ", అని అడుగుదామని.. మనసులోమాట మనసులోవుండగానే వచ్చి.. "గార్డెన్ బాగుందాండీ?, మరీబోసిపోయినట్టుంటేనూ... అద్దెకు తెప్పిచ్చానండీ.., ఎంతా.. రోజుకు మొక్కకి ఇరవైరూపాయలే..", అని చల్లగా చెప్పేసరికి.. "అద్దెకా??", అని నోరుతెరవగా.. నోట్లోవున్న బ్రష్ కిందపడి నిద్రమత్తంతా ఎగిరిపోయింది శంకర్రావుకి.

రాత్రి కరెంటుపోయిన టైములో ఇంటకిరావటంతో కనపడని విషయాలు ఒక్కొక్కటీ బయటపడి శంకర్రావుకి వారం రోజులు దాకా నిద్రపట్టని పరిస్థితి ఏర్పడింది.

ఐదువేలుపెట్టికొన్న పట్టుచీర..., నాలుగువేలతో డ్రెస్సింగ్ టేబుల్... టీవీ పెట్టుకునే టేబుల్.., కొత్త డోర్ మ్యాట్లు.. మ్యాచింగ్ కర్టెన్లు..., హాల్లోమంచి కార్పెటు.. ఇలా మొత్తం ఇల్లంతా నిండిపోయేలా కొత్తవస్తువులను ఒకొక్కటీ చూపించింది పార్వతి.

"కిచెన్ మెరిసేలా చెయ్యాలన్నావ్ గానీ..ఇప్పడు ఇవ్వన్నీఎందుకు కొన్నావే", అని కస్సుమన్నాడు శంకర్రావు. "మీరు మరీనండీ కిచెన్ అంటే కిచెన్లోనే తీస్తారా వాళ్ళు.. మొదట మన ఇంట్రడక్షన్ తో మొదలుపెట్టేది గార్డెన్లోని.. తరువాత మరి హాల్ లోనే కదా?, అవునండే మర్చేపోయాను మీ హాబీస్ అవి అడుగుతారు..బాగా ప్రిపేరయి చెప్పండే ఏమీ లేవు అనక... ఆ తరువాత.. మరి ఇక మొదలుపెడదామా వంట అని.. కిచెన్ లోకి కట్ చేస్తారు.., అక్కడనేను మేనేజ్ చేసుకుంటాలేండి..", అని.. చిరునవ్వులు చిందించింది పార్వతి.. మరి కిచెన్లో ఏమేంకొన్నావో.. అని తలపట్టుకున్నాడు శంకర్రావు.. అబ్బే అందులే పెద్దగా ఏమీకొనలేదు.. ఒక్క ఆరువేలతో మైక్రోవేవ్ వోవెన్ కొన్నా.. అది తప్ప.. అన్నీఎక్షేంజే", అంది పార్వతి.

"ఓరినాయనో, క్రెడిట్ కార్డుంది కదా అని గీసిపారేసావేంటే?, మొత్తం ఎంత చేసావేంటి బిల్లూ?", అని పెద్దగా కేకపెట్టాడు శంకర్రావు.. ఇంతలో కాలింగ్ బెల్ మోగేసరికి.. "మీరు ఆపండి..,మీరు ఈ వాటంలో కనబడకండి.. వెళ్ళి రడీ అవ్వండి  వాళ్ళొచ్చినట్టున్నారు", అని అద్దంలో ఒక్కసారి మేకప్ సర్దుకుని.. తలుపుతీసింది.

కెమేరామేన్.. లైట్ బాయ్ తో సహా దిగింది అరంగులంలోతు మేకప్ లో మునిగిపోయి జుట్టువిరబూసుకున్న ఏంకర్ సుమతి.. "రండి రండి..", అని నగలు సర్దుకుంటూ ఆహ్వానించింది పార్వతి . వాళ్ళకు టిఫిన్లు కాఫీల అందించేసరికి రడీ అయ్యివచ్చిన శంకర్రావుని పరిచయంచేసి ఎక్కడావినని కబుర్లన్నీ సుమతికి చెప్పేస్తుంటే.. శంకర్రావు ఏమనలేక..పిచ్చినవ్వు నవ్వి..వూ.., వూ.. అంటూ తలూపుతున్నాడు. కాఫీలుతాగటం అయ్యాకా.. "ఇక మొదలెడదామా మీ కర్పూరం కాకరకాయ పచ్చడి", అంది ఏంకర్ సుమతి పార్వతి వంకచూస్తూ.
"కర్పూరం కాకరకాయ పచ్చడా".. ఇదేక్కడ పచ్చడిరా దేవుడో అని ఆశ్చర్యంతో నోరొదిలేసాడు శంకర్రావు.

అలా కాదు ఇలా.. ఇలా కాదు అలా అని ఒక నాలుగ్గంటల పాటు తీసిందే తీసాడు కెమేరామేన్.., వంటంతా అయ్యాకా వెళ్ళిపోతామన్నారు టీ.వీ వాళ్ళు. "అయ్యో భోజనం చేసెల్దురుగానీ వుండండీ..", అని పార్వతి అనగానే "భొజనమా.. బాబోయ్..  మేం త్వరగా వెళ్ళాలండీ.. వేరేచోటకూడా షూటింగ్ వుంది", అని.. త్వరత్వరగా పారిపోయారు టీ.వీ వాళ్ళు.

నాలుగు రోజులు గడిచాయి... టీ.వీలో వంటలప్రోగ్రాములో తనని చూసుకుని మురిసిపోతుంది పార్వతి. "నీ కర్పూరం కాకరకాయ పచ్చడికి అక్షరాలా అరవైవేలు క్రెడిట్ కార్టు బిల్లొచ్చింది చూసావా!, నీ వంట రుచిచూసిన ఆ ఏంకర్ ఆ రోజు అంతాలా ఓక్ ఓక్ అని కక్కుకుందా..!, అయినా  వదలకుండా ప్రోగ్రామ్ అంతా ఎడిట్ చేసి ఎలా చూపిస్తున్నారో టీ.వీ వాళ్ళు.., ఛీ.. అది వేయటానికి వాళ్ళకు సిగ్గులేదు.. చూడ్డానికి నీకెలాగు సిగ్గులేదు.. నాకన్నా వుండక్కర్లే.." అని కస్సుమంటూ లేచి బయటకెళ్ళిపోయాడు శంకర్రావు.

23 వ్యాఖ్యలు:

అనిర్విన్ చెప్పారు...

HaHaHa

harephala చెప్పారు...

Excellent !!

Kathi Mahesh Kumar చెప్పారు...

:) :)

Ramakrishna Reddy Kotla చెప్పారు...

ha ha ha ha... ROFL... supero super :-))

మనసు పలికే చెప్పారు...

శ్రీనివాస రాజు గారూ.. బాబోయ్.. సూ...పర్ అండీ.. ప్రతి సీన్‌కి కడుపు పట్టుకుని నవ్వాను..:))))) కళ్లకు కట్టినట్లుగా రాసేసి కామెడీ పండించేశారు..

మంచు చెప్పారు...

హ హ హ .... మీ వివరాలు గృహిణి టీవికి పంపించా...ఇక మీ ఇంటికి కొత్త సమాను వచ్చేసినట్టే... కంగ్రాట్స్... అన్నట్టు చెప్పడం మర్చిపొయా... మీ క్రెడిట్ కార్డు జాగ్రత్త...:-)
మీకొ మైల్ అంపా చూడండి

శ్రీనివాసరాజు చెప్పారు...

@అనిర్విన్ గారు
మీ నవ్వులకు ధన్యవాదములు

@ఫణిబాబు గారు
మీకు నచ్చినందుకు సంతోషం. ధన్యవాదములు

@కత్తి మహేష్ కుమార్ గారు
మీ డబుల్ నవ్వులకు డబుల్ ధన్యవాదములు. :)

@రామకృష్ణారెడ్డి కోట్ల గారు
మరీ అంతలా కిందపడి (ROFL) నవ్వుకోకండి.. ఇంట్లో అయితే పర్వాలేదు.. ఆఫీసులో అయితే.. కష్టం కదా అని. :-). మీ కామెంటుకు ధన్యవాదములు

@మససుపలికే గారు
ఈ టపా కడుపుబ్బ నవ్వించినందుకు సంతోషం. ధన్యవాదములు.

@మంచు గారు
ఏం పర్వాలేదు పంపించండి.. ఆల్రేడీ ప్రిపేరయి వున్నా.. :-)
మీ కామెంటుకు ధన్యవాదములు.

వేణూ శ్రీకాంత్ చెప్పారు...

హ హ బాగుందండి :-) ఈ ప్రోగ్రాం చూసినపుడు నేకూడా ఇలానే ఆలోచిస్తుంటానండి కొత్త సామాన్లు ఖరీదైన సెటప్ చూసి :)

కౌటిల్య చెప్పారు...

nenu mumbai nunchi maa oorochaka teariggaa telugulo comentutha..k...

నేస్తం చెప్పారు...

రాక్షసి దెయ్యం ఎన్నెన్ని మాటలన్నారండి.. మీ శ్రీమతికి చెప్పెస్తా..మిమ్మల్ని మనసులో అనేవన్ని కధల రూపం లో అనేస్తున్నారు అని .. :)

శ్రీనివాసరాజు చెప్పారు...

@వేణూ శ్రీకాంత్ గారు
టపా నచ్చినందుకు సంతోషం. ఆమాత్రం సెటప్ లేకపోతే మనమిలా చెప్పుకోలేంకదామరి. :-)

@కౌటిల్యగారు
మీరు ముంబయి వెళ్ళారా.. ఆహా.. బాగుంది.. ఊర్లన్నీ చక్కగా తిరుగుతున్నారు.

@నేస్తం గారు
పర్వాలేదు చెప్పండి. అవన్నీ టైపుతప్పులు..
అందాల రాక్షసి.., బంగారు దెయ్యం.. అని రాయబోయాను.. చేయి తడబడి కీబోర్డులో ఇరుక్కుని.. అలా టైపుతప్పయ్యిందని కవర్ చెసేస్తా.. :-)

3g చెప్పారు...

//త్రీడీ సినిమాలో దేవతసినిమా చూసినట్టుగా పైనుండి కిందకు దిగపోసుకున్న బంగారునగలతో.. మొహంమీదకొచ్చి ఎదురుగా నిలబడుంది పార్వతి//

హ్హ హ్హ మీరు భలే వర్ణిస్తారండీ.

శ్రీనివాసరాజు చెప్పారు...

@3జి గారు
టపా నచ్చినందుకు సంతోషం.
అవును ఎప్పుడన్నా త్రీడి సినిమాలో దేవతసినిమా చూసారా :-)

కామెంటుకు ధన్యవాదములు

bonagiri చెప్పారు...

బాగుంది.

bonagiri చెప్పారు...

బాగుంది.

bonagiri చెప్పారు...

బాగుంది.

కౌటిల్య చెప్పారు...

రాజు గారూ, మళ్ళా ఇప్పుడు చదుతున్నా...నవ్వు ఆపుకోలేకపోతున్నానండీ బాబూ...

""రండి రండి..", అని నగలు సర్దుకుంటూ ఆహ్వానించింది పార్వతి ."..నాకు ఎప్పుడూ ఇదే డౌటు..అసలు వంట చేసేప్పుడు అన్ని నగల్తో అవసరమా అని..కాని ఒకసారి చూశాను..ఒక బ్రాహ్మలావిడ చక్కగా మడి కట్టుకుని చేసింది...

కర్పూరం కాకరకాయ పచ్చడా..ఎలా వస్తాయండీ బాబూ మీకు ఈ థాట్సు....ః)..నాకు ఆ పేరు చూడగానే కిసుక్కు,కిసుక్కుమని నవ్వొచ్చేస్తుంది...ః);)

కౌటిల్య చెప్పారు...

అయినా నేను ముంబయి వెళ్ళే ముందు మీకు చెప్పాను కదండీ..మీ ఆవిడ వంటల ప్రహసనంలో పడి మర్చిపోయినట్టున్నారు...ః))

శ్రీనివాసరాజు చెప్పారు...

@కౌటిల్యగారు
మీ కిసుక్కు కిసుక్కునవ్వులకు సంతోషం.
బంగారం కొనుక్కున్నాకా ఆమాత్రం చూపించకపోతే ఎలాగండీ మరీ. అందులోనూ ఆర్నెల్లకోసారో సంవత్సరానికోసారో టంకుపెట్టెలోంచి తీస్తారాయే.. :-)

థాట్సుకేం కరువులేండి.. మధ్యాన్నం ఏ టీవీచానల్ పెట్టి వండే వంటకాలను చూస్తే.. ఇలాంటి ఐడియాలు వచ్చేయవూ.. మీరూ చూడండి.. ఆల్ ద బెస్టూ... :-)

లలిత చెప్పారు...

సెటైర్ అదిరిందండీ రాజుగారు. ప్రతీ పదంలోనూ కసి కనిపిస్తుంది. కచ్చితంగా స్వానుభవంలోంచీ పుట్టినట్టుంది మీ కధ .
"కళ్ళళ్ళో కళ్ళుపెట్టి చూసే ధైర్యంలేక.. ట్యూబులైట కాంతిలో... పక్కనేవున్న సాంబారు గిన్నెలో పడ్డనీడలో పార్వతొంక చూస్తూ చెప్పాడు శంకర్రావు."..... అదిరిందండీ

శ్రీనివాసరాజు చెప్పారు...

@లలిత గారు

స్వానుభవమే.. టీ.వీ లో చూసిన అనుభవం.. అంతేకానీ వండిన అనుభవాలేమీలేవులేండి.

మీ కామెంటుకు ధన్యవాదములు.

రసజ్ఞ చెప్పారు...

చాలా బాగా వ్రాశారండీ! బాంబు సాంబారువడ్డించినట్టు ప్లేటులో వడ్డించింది హహహ నవ్వలేనింక!అత్యద్భుతంగా ఉంది.

శ్రీనివాసరాజు చెప్పారు...

రసజ్ఞ గారు,

నవ్వుకున్నందుకు సంతోషం. మీ వ్యాఖ్యకు ధన్యవాదములు. :)

Related Posts Plugin for WordPress, Blogger...